Revised
ننڍي شادي جا منفي اثر
Masab
M.A/MMC/2K20
Roll no: 30
پيپلزپارٽي جي سينيٽر شيري رحمان پاران سينيٽ ۾ ، ننڍي عمر ۾ شادي ڪرڻ تي پابندي وارو بل پيش ڪيو ويو . ان بل
جو متن هي هو ته گهٽ ۾ گهٽ شادي جي قانوني عمر 18 سال رکي وڃي ۽ ان کان ننڍي عمر جي شادين تي پابندي هجي ۽
قانون تي عمل نه ڪندڙن تي ڪ ڏنڊ ۽ سزا لاڳو هجي. تفصيل ٻڌائيندي شيري رحمان چيو ته ، اقوام متحده جي چلڊرين فنڊ
جي تحقيق موجب پاڪستان ۾ 21 سيڪڙو شاديون 18 سالن کان گهٽ عمر ۾ ٿين ٿيون. هن ٻڌايو ته ٻين اسلامي ملڪن
جهڙوڪ متحده عرب امارات، انڊونيشيا، ترڪي ۽ اومان ۾ به شادي جي عمر ارڙهن سال آهي. ان کان اڳ 2014 ۾ سنڌ
اسيمبلي مان اهو بل منظور ٿي چڪو آهي ۽ ڪجھ جاين تي ان جو عمل به ڏسڻ ۾ آيو آهي . سينيٽ ۾ بل پيش ٿيندي ئي هميشه
وانگر سڀ کان پهرين مذهبي ڌرين جماعت اسلامي ۽ جي يو آء فنڪشنل ان تي اعتراض واري سخت مخالفت ڪئي . ان
کانپوء حڪومتي ڌر تحريڪ انصاف جا ماڻهو به ان مخالفت ۾ شامل ٿي ويا. خير گوڙ شور جي هوندي به اهو بل سينيٽ
مان پاس ٿي ويو ۽ ان جي خلاف ورزي تي ٽي سال قيد ۽ لک جو جرمانو پڻ لڳایو ویو آهي.
خبر ناهي انهن مذهب جي پرچار ڪندڙن جي ذهن ۾ ڪهڙي ڳالھ ٿي اچي ، جو هو ان شيء تي اعتراض ڪن ٿا جيڪا سڀن
جي ڀلي لاء آهي . ننڍي عمر ۾ شادين جو نقصان هڪ ڇوڪري کي ته ٿئي ئي ٿو ، پر سڄي سماج کي ٿئي ٿو . شادي کانپوء
گهر ۽ ٻارن جي ايڏي وڏي ذميواري هڪ عورت تي ئي اچي ٿي ۽ اها عورت اگر ننڍي عمر جي ڇوڪري آهي ته ، ٻالڪپڻ
جي عمر ۾ هو گهر جي سار سنڀال ۽ ٻارن جي سٺي پالنا نٿي ڪري سگهي ، جنهن سان ٻار جي تربيت ۾ ۽ جسماني پرورش
۾ ڪمي رهجي ويندي آهي . نه صرف اهو پر ننڍي عمر جي ڇوڪرين جا ويم دوران موت جا واقع ٿين ٿا ۽ ٻارن جي پڻ
مرڻ جا واقعا سامهون اچن ٿا. ميڊيڪل طور به اهو ثابت ٿيل آهي ته ننڍي عمر جي شادي هر لحاظ سان خطرناڪ آهي .
جنسي عمل کان وٺي ٻار پيدا ٿيڻ تائين ، ننڍي عمر جي شادي سڄي سماج لاء ناسور ۽ هڪ ڇوڪري لاء عذاب مثل آهي .
جڏهن راند کيڏڻ جي عمر ۾ نياڻي کي پرڻايو ويندو ته ان جي نفسيات تي تمام گهڻا منفي اثر پون ٿا. ڇو ته ان کي جڏھن پاڻ
کي ماءُ جي پرورش ۽ تربيت جي ضرورت هجي ٿي ان عمر ۾ هو پاڻ ماءُ بڻجي وڃي ٿي. ٿرپارڪر ۾ ٿيندڙ ٻارن جي موت
جو ڪارڻ ڪجھ قدر ڊاڪٽر اهو به ٿا ٻڌائن ته ، ڇوڪرين جي ننڍي عمر ۾ شادي سبب هو صحتمند ٻار کي جنم نٿيون ڏين
۽ ٻار بيمار ڄمڻ سبب موت واقع ٿئي ٿو.
اهي سڀ اوڻايون ۽ نقصان ڄاڻيندي به خبر ناهي اسان جي سماج کي ڪهڙي پِٽ لڳل آهي جو ، هڪ نياڻي کي پرڻائڻ لاء
ارڙھن سالن جي عمر جو به انتظار نٿا ڪري سگهن.
جيتوڻڪ سرڪار به ارڙهن سالن کان اڳ ان کي شناختي ڪارڊ نٿي ڏئي، ان کي ووٽ وجهڻ جو حق حاصل ناهي ، پوء به
والدين کي اهڙي ڪهڙي وٺ پڪڙ هجي ٿي جو هو 12 سالن کان 16 سالن تائين جي عمر ۾ نياڻي جي شادي ڪرائي
ظاهري طور پنهنجو بار لاهي ٿا ڇڏين . پر اهو نٿا سوچين ته سندن ننڍن ٻارڙين تي برداشت کان مٿي بار ڏئي ڪيڏي وڏي نا
انصافي ڪري رهيا آهيون . جيڪو سڌو سنئون هڪ ڏوھ آهي .
پاڪستان ۾ آبادي ۽ گهراڻن جي ڊيموگرافڪ هيلٿ سروي جي چار سال الڳ انگ اکرن موجب 13 سيڪڙو ڇوڪرين جي
شادي 15 سالن جي عمر ۾ ٿئي ٿي ۽ 40 سيڪڙو ڇوڪرين جي شادي ارڙھن سالن جي ڄمار ۾ ٿي ويندي آهي. ننڍي عمر
جي انهن شادين جي نتيجي ۾ پاڪستان ۾ مائرن جي موت جي شرح هڪ لک ويمن تي 276 ۽ تازي ڄمندڙ ٻارن جي موت
جي شرح هڪ هزار تي 78 ٻارن جا موت واقع ٿين پيا. سنڌ صوبي اندر 72 سيڪڙو ڇوڪريون ويھ سالن جي عمر کي
رسڻ کان اڳ ئي مائرون بڻجي ٿيون وڃن. سنڌ ۾ ويم دوران مائرن جي موت جي شرح لک تي 314 آهي. هڪ ڪاٿي
موجب دنيا ۾ اٽڪل 5 ڪروڙ 75 لک ڇوڪرين کي والدين کيڏڻ ڪُڏڻ واري عمر ۾ پرڻائي روانو ڪري ڇڏيندا آهن. جن
مان سڀ کان وڏو تعداد هندوستان جو آهي.
گڏيل قومن جي آبادي جي ڀلائي جي سرگرمين واري کاتي (UNFPA) جي اڀياس مطابق ، اڻ مڪمل توليدي نظام رکندڙ
نياڻي جڏھن ويم جي عمل مان گزرندي آهي ته اڪثر فيسٽولا جي روڳ جو شڪار ٿي ويندي آهي . جنهن جي ڪري ان جي
ٻچيداني ، مثاني ۽ وڏي آنڊي کي سخت نقصان رسندو آهي. انهن ننڍين عمر وارين مائرن ۾ وزن جي گهٽتائين ۽ وٽامنز جي
کوٽ پڻ وڏي تعداد ۾ ٿئي ٿي.
